عندك ذنب و مش عارف تخلص منه ؟!

[عاصى]

كم واحد مننا عنده ذنب مش عارف يتخلص منه
بتغتابى ناس كتير ؟؟
بتكذب كتير ؟؟
بتفوت صلاة الجماعة فى المسجد ؟؟
بتجمعى الصلوات على بعض ؟؟

قال صلى الله عليه وسلم:

ما من عبد مؤمن إلا وله ذنب يعتاده الفينة بعد الفينة، أو ذنب هو
مقيم عليه لا يفارقه حتى يفارق الدنيا، إن المؤمن خلق مفتنا تواب نساء، إذا ذُكِّر ذَكَرَ .

كتير مننا ليه ذنوب و اخطاء غافل عنها
يعملها مره و يضايق
يرجع يعملها تانى و يزعل شويه
لحد ما يعتاد عليها و يغفل عنها و عن شرها و ليعاذ بالله

انا عندى فكرة .. و صبركم بالله معايا
هى فكرة بسيطة جـــــــــــدا و جايز ناس تستصغرها
لكن جايز ناس تانية تكون محتاجالها
فهقولها و امرى لله بقى

انا عاوزاكم تجيبوا معايا ورقة و قلم .. احم .. قلمين
واحد احمر و واحد رصاص

و ترسموا قلب كبيــــــــــــر بالقلم الاحمر >>>> ده قلبكم
و بعدين نقسم القلب لاى عدد من المربعات .. بالقلم الاحمر برضه
و ليكن على سبيل المثال عشرين مربع .. يعنى شوية خطوط بالطول و العرض

و بعديــــــــــن ؟؟

و بعدين هنشيل الورقه دى معانا ، فى شنطتنا فى جيبنا مش مهم
المهم انها تكون معانا فى كل مكان

فوت عليك صلاة الجماعه ؟ ....... لون مربع من المربعات بالقلم الرصاص
اغتبتى واحده من صاحباتك ؟ ....... لونى مربع بالقلم الرصاص
كذبتى كذبه؟ " مافيش حاجة اسمها بيضه و لا بمبى " لــــــونى يلا

و لازم نكون صادقين مع نفسنا لان ماحدش هيراجع ورانا و لا هيتابع علينا

بعد فتره اسبوع مثلا " ده اذا المربعات مش كملت من قبلها "
هتلاقى للاسف القلب اللى كان بيمثل قلبك بقى كله اسود وكله ذنوب و اخطاء

الرسول عليه افضل الصلاة و السلام بيقول

{إن المؤمن إذا أذنب ذنبا كانت نكتة سوداء في قلبه، فإن تاب ونزع
واستغفر صقل قلبه، فإن زاد زادت حتى يغلف قلبه؛ فذلك الران الذي
قال الله جل ثناؤه: "كلا بل ران على قلوبهم ما كانوا يكسبون " } .

يعنى الكلام ده مش من عندى

طيب نعمــــل اييييه ؟

بعد اسبوع هنزود على ادواتنا جومه " ممحاه ، استيكه "
ايا كان اسمها بقى حاجه تمسح و خلاص

نستغفر الله مائة مرة من قلوبنا و باذن الله يغفر لنا
فنقوم بمسح مربع من المربعات
و نستغفره مرة اخرى و نمسح ما كان منا من ذنوب و اخطاء

قال عليه افضل الصلاة و السلام :

" ما مِنْ رَجُلٍ يُذْنِبُ ذَنْبًا ثُمَّ يَقُومُ فَيَتَطَهَّرُ ثُمَّ يُصَلِّي ثُمَّ يَسْتَغْفِرُ اللَّهَ
إِلَّا غَفَرَ اللَّهُ لَهُ ثُمَّ قَرَأَ هَذِهِ الْآيَةَ "وَالَّذِينَ إِذَا فَعَلُوا فَاحِشَةً أَوْ ظَلَمُوا أَنْفُسَهُمْ
ذَكَرُوا اللَّهَ فَاسْتَغْفَرُوا لِذُنُوبِهِمْ" إِلَى آخِرِ الْآيَةِ "

و هكذا ...

يكون بالنسبة لينا دفتر نراجع فيه نفسنا
كا ما نُخطئ نلون مربع بالرصاص .. و الحمد لله انها لسه بالرصاص
نلحق نفسنا و نستغفر ربنا قبل ما يجي وقت لا ينفع فيه الاستغفار و لا الندم
و نمسح ما كان من هفوات انفسنا ..